15 сакавіка ў нашай краіне адзначаюць адно з галоўных дзяржаўных святаў - Дзень Канстытуцыі Рэспублікі Беларусь.
15.03.2025
Дзяржаўнае свята Дзень Канстытуцыі штогод адзначаецца ў Беларусі 15 сакавіка. Яно
з'яўляецца сімвалам незалежнасці беларускага народа, шматвяковага шляху
развіцця дзяржавы і грамадства на нашай зямлі.
Для нашай краіны Канстытуцыя – найважнейшы атрыбут дзяржавы, сімвал годнасці і
гонару. Будучы Асноўным Законам Беларусі, яна вызначае асновы дзяржаўнай улады
і грамадскага жыцця, гарантуе правы і свабоды грамадзян, а таксама служыць важным
фактарам для фарміравання нацыянальнай самабытнасці беларусаў.
Наша Канстытуцыя ўвасабляе ў сабе гістарычны вопыт станаўлення беларускай
дзяржаўнасці. Яна стала важным крокам на шляху да пабудовы нашай дзяржавы,
уключыла ў сябе мудрасць папярэдніх пакаленняў, замацавала прававыя, палітычныя і
ідэалагічныя асаблівасці дзяржавы і грамадства, дакладна вызначыла прыярытэты
нацыянальнага развіцця.
Менавіта на тэрыторыі Беларусі дзейнічаў адзін з першых канстытуцыйных актаў
сярэднявечнай Еўропы – Статут Вялікага Княства Літоўскага. У савецкі перыяд нашай
гісторыі Асноўны Закон прымаўся ў 1919, 1927, 1937 і 1978 гадах.
15 сакавіка 1994 года была прынята Канстытуцыя суверэннай Беларусі. 27 лютага 2022 года
адбыўся Рэспубліканскі рэферэндум па пытанні ўнясення змяненняў і дапаўненняў у Асноўны
Закон, вынікам якога стала дзеючая Канстытуцыя.
Паважаць і выконваць Асноўны Закон – значыць паважаць сваю краіну, паважаць самога сябе!