Рэспубліканскі цэнтр арганізацыі медыцынскага рэагавання

Па дадзеных САА, ужыванне тытуню з'яўляецца адной з самых значных пагроз для здароўя людзей ва ўсім свеце. У тытунным дыме прысутнічае больш за 4000 хімічных рэчываў, з якіх, па меншай меры, 250 вядомыя як шкодныя, а больш за 50 як канцэрагены. Уздзеянне гэтых хімічных рэчываў не памяншае ні так званая лёгкасць цыгарэты, ні фільтры. Нікацін з'яўляецца мацнейшым раслінным ядам, які блакіруе паступленне кіслароду ў клеткі арганізма. Ад дзеяння тытуннага дыму пакутуюць усе сістэмы органаў.

Курэнне тытуню прыводзіць да развіцця такіх захворванняў, як рак лёгкіх, глоткі, гартані, ротавай поласці, хранічны абструктыўны бранхіт, эмфізэма лёгкіх, гінгівіт, стоматыт, язва страўніка, прыгнячае імунітэт, спрыяе заўчаснаму старэнню, паніжае розумавыя здольнасці, асабліва ў падлеткаў. У выніку курэння цыгарэт звужаецца прасвет крывяносных сасудаў, павышаецца артэрыяльны ціск, парушаецца кровазварот, як вынік – павялічваецца рызыка інфаркту міякарда, інсульту галаўнога мозга. Спажыўцы тытуню, паміраючы заўчасна, пазбаўляюць свае сем'і даходаў, павялічваюць выдаткі на медыцынскую дапамогу і перашкаджаюць эканамічнаму развіццю.

Тыя, хто курыць, шкодзяць не толькі сабе, але і навакольным, падвяргаючы іх небяспецы пасіўнага курэння (удыханне другаснага тытуннага дыму). Бяспечнага ўзроўню ўздзеяння другаснага тытуннага дыму не існуе. Сярод дарослых другасны тытунны дым выклікае сур'ёзныя сардэчна-сасудзістыя і рэспіраторныя захворванні, уключаючы ішэмічную хваробу сэрца і рак лёгкіх.

Акцыя «Беларусь супраць нікаціну» – гэта яшчэ адна нагода задумацца пра сваё здароўе, пра здароўе сваіх дзяцей і адмовіцца ад наступнай цыгарэты.

Неабходна, каб кожны чалавек мог дыхаць паветрам, свабодным ад тытуннага дыму.